Алматы көшелері: Үмбетбаев Әнуәрбек

«Екпіннің» бүгінгі «Алматы көшелеріне саяхат» айдарында Қазақ опера өнерінің негізін қалаушыларының бірі, Алматы қаласының тумасы Үмбетбаев Әнуәрбек Бейсембайұлының құрметіне аталған көше.

Үмбетбаев көшесі Бостандық пен Алмалы аудандарында, Гагарин мен Жароков көшелерінің ортасында орналасқан. Бұрын «12-линия» деп аталған бұл көше 30-жылдары Есентай мен Қарасу өзендерінің аралығындағы аумақтың қалаға қосылуына байланысты қалыптасқан. Үмбетбаев көшесі Төле би көшесінен басталып солтүстіктен оңтүстікке қарай Бәсенов көшесіне дейін созылып жатыр. Ол Бөгенбай батыр, Қарасай батыр, Қабанбай батыр, Жамбыл, Жандосов, Бәсенов көшелерін қиып өтеді.

Үмбетбаев Әнуәрбек Бейсембайұлы 1914 жылдың 7 наурызында Алматы қаласында дүниеге келген. Музыкаға бала кезінен құмартқан Әнуәрбек жастайынан музыка сабағынан қосымша үйірмелерге қатысып, өз-өзін дамыта бастайды. Ол 1931 жылы Кеңес әскерінің қатарына алынып, ол жақта 1937 жылға дейін Қазақ әскери кавалерия полкы ансамблінің жетекшісі болады.

1937 жылы кәсіби музыкалық білім алу үшін Опера және балет театры жанындағы студияға түсіп, оқу курсын тәмамдағаннан соң сол жерде қызмет етуге қалады. Ал 1958-1960 жылдары Құрманғазы атындағы Қазақ ұлттық консерваториясын бітірген.

Үмбетбаев Әнуарбек Ұлы Отан соғысы жылдары майдандық концерт бригадасында болған.

Ол М.Төлебаевтың «Біржан-Сарасында» - Біржан, А.Жұбанов пен Л.Хамидидің «Абай» мен «Төлеген Тоқтаровында» - Айдар, Төлеген, Е.Брусиловскийдің «Дудар-ай», «Ер Тарғын», «Жалбырында» - Думан, Тарғын, Қайрақбай, Ж.Бизенің «Карменінде» - Хозе, Н.Жигановтың «Алтыншашында» - Жек сынды тағы да басқа 40-қа жуық опералық партияларды орындаған.